Калі вы беларус/ка, які турбуецца пра стан роднай мовы, калі вы бабруйчанін/ка, які шукае, як цікава адзначыць 21 лютага. то пэўна вы ставіце сабе пытанне, дзе правесці гэты дзень?
У гэтым посце вы дазнаецеся, што гэта за дзень і чаму важна гаварыць пра яго. Як можна адсвяткаваць запамінальна. А каб разабрацца больш у гэтай тэме, трэба патраціць пэўны час. Мы дапаможам вам зрабіць гэта пазнавальна і разнастайна. Наперад!
Што мы з вамі можам зрабіць для беларускай мовы 21 лютага 2020 года:
- Наведаць курсы «Мова нанова» ў Тайм-клубе «1387». Пачатак а 19 00.
- Цэлы дзень размаўляць па-беларуску. І няхай гэта будзе трасянка.
- Зрабіць свой пост ці сторыс у сацсетках па-беларуску, пра мову.
- Набыць у краме кнігу ці часопіс па-беларуску.
- Зладзіць тэматычную вечарыну, дзе «дрэскодам» будзе беларуская мова)
- Пачаць флэшмоб у сацсетках «Слухай сваё», «Свае Вершы», «Чытаю кнігу…»
- Мудрыя выказванні беларускіх аўтараў пра мову, Радзіму, сэнс жыцця можна занатаваць на старонках нататніка ці сацсетках.
Любы дзень – гэта час, які мы пражываем.
Гэта тое, што не паўторыцца больш ніколі. Гэта наш унікальны досвед, які застаецца ў гісторыі пэўнай асобы, любой краіны ці ўсяго чалавецтва цалкам.
У лістападзе 1999 года ЮНЭСКА абвясціла Міжнародны дзень роднай мовы, які адзначаецца кожны год у лютым з 2000 году, дзеля захавання і развіцця моваў малых нацыяў і народнасцяў, якія знаходзяцца пад пагрозай знікнення.
Дні роднай мовы ў Беларусі пачалі ладзіцца дзяржаўнымі ўстановамі з 2009 года.
Дзень святкавання — 21 лютага, быў абраны не выпадкова. У гэты дзень у 1952 годзе загінулі пяць студэнтаў, якія змагаліся за наданне мове бангла статуса дзяржаўнай у тагачасным Пакістане, усходняя частка якога пазней стала незалежнай дзяржавай Бангладэш.
У свеце існуе каля 6000 моў і 43% з іх знаходзяцца пад пагрозай знікнення.
Кожныя два тыдні знікае адна мова, якая забірае з сабой цэлую культурную і інтэлектуальную спадчыну.
Паводле дадзеных ЮНЭСКА, беларуская мова апынулая ў той групе моў, якім пагражае знікненне. У Атласе моваў свету ў небяспецы яна пазначана як vulnerable (уразлівы, саслабелы). Гэта першая з чатырох ступеняў на шляху да вымірання.
Самая мілагучная пасля італьянскай – гэта беларуская мова!
Так вырашылі эксперты ЮНЭСКА. Пэўныя гісторыкі сцвярджаюць, што яна яшчэ і адна са старажытных сярод славянскіх, бо ў Вялікім Княстве Літоўскім на ёй пісаліся ўсе законы, вяліся суды, адбываліся соймы і іншае. Адны толькі чэхі раней за нас займелі надрукаваную Біблію на сваёй мове, якая з`явілася ў 1488 годзе. А ў 1517-м — у Празе доктар лекарскіх навук Францішак Скарына з Полацка выдаў Біблію па-старабеларуску — першую друкаваную ўсходнеславянскую кнігу. Але статыстыка перакрэслівае ўсё пачуццё гонару, бо падчас апошняга перапісу ўсяго 23,4% жыхароў краіны сказалі, што размаўляюць па-беларуску ў паўсядзённым жыцці.
Сэнс гэтага свята – гэта заахвоціць да моўнай разнастайнасці і шматмоўнай адукацыі, а таксама спрыяць усведамленню моўных і культурных традыцый, якія грунтуюцца на ўзаемапаразуменні, цярпімасці і дыялогу (ЮНЭСКА). Сваімі словамі – гэта паважаць усе мовы. Вывучаць ангельскую ці іншыя замежныя мовы для добрай камунікацыі ў вандроўках, на працы. Але не забываць сваю карэнную, матчынную, якая захоўвае традыцыі. Толькі родная мова робіць магчымым сапраўдны дыялог паміж сучасным чалавекам і яго продкамі.
Для кожнай нацыі Дзень роднай мовы асаблівы, бо няма народа без мовы, няма мовы без яго носьбіта. І беларусы не выключэнне. Паэтычная, жывая, мілагучная, песенная, старажытная, сучасная! Вось якая нам у спадчыну засталася ўнікальная мова. Усё залежыць ад нас, усё залежыць ад жадання кожнага з нас!
Тэма Міжнароднага дня роднай мовы ў 2020 годзе – «Мовы без меж».
Як адзначаюць свята ў нашым горадзе, у Бабруйску?
Школы праводзяць канцэрты і літаратурна-музычныя вечары, дзе лепшыя чытачы дэкламуюць вершы і ўрыўкі з твораў нацыянальных аўтараў. Малым расказваюць пра вартасці роднай мовы, патрэбы ведаў ейных асаблівасцяў. Бібліятэкі робяць выставы кніг.
Адзiн дзень — гэта, канешне, нiшто, але ж трэба з нечага пачынаць! Поспеху нам і плёну!
Мова Нанова - Бабруйск
